Ngrasa Rasaning Liyan

 SEBUAH RENUNGAN TUK KITA SEMUA
Dening : Sudratama

Sunare srengenge awan kuwi ora mekakat panase. Tapi kanggone Vian, kabeh mau ora dirasa. Malah, sumilire angin sing ora sepiraa, kaya nggawa hawa tentrem kang ora kinira. Jangkahe cilik2 nlusuri dalan watu satengahing bulak, ora sabar pengin enggal tekan omah.

Ora maido, awan kuwi Vian pancen lagi bungah ati. Salembar kertas gambar bintang ana jero tas ijone, bakal dadi crita dawa kanggo Bapak lan Ibune. Kertas kang ana tulisan gedhe : “JUARA LOMBA MEMBACA” diteruske jeneng lengkape “DAVIAN ALIF PRATAMA” mesthi bakal gawe bungahe ati wong tuwane.

“Assalamualaikum. Vian wangsul, Ibu, Bi Aneng”.

Tanpa nunggu wangsulan seka jero, Vian gage2 mbuka lawang ngarep. Bi Aneng sing meh mbuka saka njero, kaget ora ketulungan.

“Nak Vian, wonten punapa, ta? Sajak dioyak2 segawon galak?”

“Bibi, ibu wonten pundi? Ibu sampun kondur, ta, Bi?”

 “Nak Vian, ibu wonten kamar. Mbokmenawi nembe sholat dhuhur. Nak Vian gantos ageman riyin. Mangke Bibi ...”

“Mboten, Bi. Vian badhe matur Ibu. Vian dados juara ...”

“Ana apa, iki? Sajak ana swarane bocah bagus, tapi kok ana ganda asem2 apa, ya?”, ature Ibu karo mbuka lawang kamar.

            “Ibu, Vian dados juara membaca cerita pendek. Coba Ibu pirsani, Vian diparingi hadiah saking Bapak Kepala Sekolah. Wau lombane rame sanget, Bu. Niki crita sing wau Vian waos”.

“Iya, cah pinter, putra Ibu. Saiki salin dhisik sragam sekolahe. Asem–e  juara banget. Sayur asem masakane Bi Aneng wae kalah asem. Mengko diteruske maneh critane”.

“Tapi, Bu. Vian hebat, kan? Bi Aneng mawon dereng karuwan saged maos crita niki ngantos dados juwara, kados Vian. Bi Aneng, coba pirsani tulisan niki!”

Bi Aneng sajak mangu2 arep nyedhaki putra bendarane kuwi. Tapi Ibu enggal paring kode supaya Bi Aneng ndelok crita sing dipamerke Vian.

“Coba Bi Aneng waos crita niki. Nek saged langkung sae dibandhing Vian, hadiah niki Vian caosaken Bibi”.

Bi Aneng sing ora tau ngerti waca tulis mesthi wae salah tingkah kudu maca tulisan sing cilik2, nrenyek kuwi.

“Bibi mboten saged maos, Nak. Nek ken masak napa mawon, Bibi sanggup. Asal, ampun ken maos, napa malih nulis”.

“Bi Aneng pun sepuh kok dereng saged maos? Bibi mboten sinau, sih!”

Ibu sing awit mau ora komentar, akhire urun rembug.

”Cah bagus, ora pareng matur kaya ngana karo Bi Aneng. Bi Aneng pinter masak, Vian pinter maca. Saben manungsa duwe kepinteran dhewe2”.

“Bu, napa Bi Aneng mboten nelangsa, saged mirsani tulisan tapi mboten saged maos?”

Ibu ora gage mangsuli pitakonan kuwi. Ibu mbuka tas kerjane nuli ngetokke siji buku. Amarga saben dinane mulang basa Mandarin, buku2ne uga basa Mandarin. Malah buku sing ditokke ditulis mawa huruf kanji.

“Coba, wacanen bukune Ibu iki! Sakaca wae!”

Vian nyawangi huruf – huruf ana buku kuwi. Ora ana siji2a sing bisa diwaca. Apamaneh sakaca, tembung siji wae ora ana sing dingerteni.

“Ibu, Vian mboten saged maos. Vian salah, sampun damel Bi Aneng sedhih amargi ken maos, padhahal Bi Aneng mboten saged maos”.

“Cah pinter, Ibu seneng akhire awakmu ngerti. Ya kaya ngana sing dirasakke Bi Aneng mau. Ben durung pinter maca huruf kanji, Vian rak wis pinter maca huruf latin, ta? Semana uga Bi Aneng. Sanajan durung pinter maca tulis, tapi pinter masak, ngurus omah, blanja, lan akeh kepinteran liyane”, ature ibu karo ngelus mbun2e putra kinasihe.

           

Pengirim

Jeneng             :  Sudarmanto

Jeneng singlon :  Sudratama

Alamat                        :  SMP Negeri 1 Dayeuhluhur

Jl. Sindanglangu – Dayeuhluhur Kec. Dayeuhluhur

Kab. Cilacap Kode Pos 53266